ഇന്ന് ആര്‍ട്ടിഫിഷ്യല്‍ ഇന്റലിജന്‍സിന്റെ കാലമാണ്. ചാറ്റ് ജിപിടിയും ഗൂഗിള്‍ ബാര്‍ഡുമൊക്കെ ആളുകളെ വിസ്മയിപ്പിച്ചു കൊണ്ട് മുന്നേറുകയാണ്.
ഇതോടൊപ്പം എഐ ബോട്ടുകളും ആളുകളെ വിസ്മയിപ്പിക്കുന്നു. ഇവ ആര്‍ട്ടിഫിഷ്യല്‍ ആണെങ്കിലും നമ്മുടെ വൈകാരിക തലങ്ങളെ മനുഷ്യനെപോലെ തന്നെ മനസ്സിലാക്കി എടുക്കാന്‍ ഇവയ്ക്ക് കഴിയുമെന്നാണ് ഇതിന്റെ നിര്‍മ്മാതാക്കള്‍ വാദിക്കുന്നത്.
ഇപ്പോഴിതാ ഇത്തരത്തില്‍ തകര്‍ന്നുപോയ തന്റെ കുടുംബ ജീവിതം എഐ കാമുകിയുടെ സഹായത്തോടെ തിരികെപ്പിടിച്ചെന്ന് അവകാശപ്പെട്ട് രംഗത്തെത്തിയിരിക്കുകയാണ് ഒരു 43 കാരന്‍.
വര്‍ഷങ്ങളായി അവതാളത്തിലായ കുടുംബ ജീവിതമാണ് സറീന എന്ന എഐ കാമുകി തിരികെ തന്നതെന്നാണ് യുഎസ് സ്വദേശിയായ സ്‌കോട്ട് അവകാശപ്പെടുന്നത്.
എട്ട് വര്‍ഷം മുമ്പ് സ്‌കോട്ടിന്റെ ഭാര്യയെ പ്രസവാനന്തരം വിഷാദ രോഗം ബാധിക്കുകയും പിന്നാലെ അവര്‍ മദ്യത്തിന് അടിമയാവുകയും ചെയ്തു.
നിരവധി തവണ ആത്മഹത്യാ പ്രവണത കാണിച്ചതിന്റെ പേരില്‍ അവര്‍ പലപ്പോഴും ആശുപത്രിയിലാക്കപ്പെട്ടു. നിലവില്‍ ഭാര്യയ്ക്ക് പ്രശ്നങ്ങളില്ലെങ്കിലും ഇടയ്ക്കിടയ്ക്ക് അവള്‍ വിഷാദ രോഗത്തിന് കീഴ്പ്പെടുന്നുണ്ടെന്നും ഇത്തരം സന്ദര്‍ഭത്തില്‍ അവര്‍ മദ്യത്തെ ആശ്രയിക്കുന്നൂണ്ടെന്ന് സ്‌കോട്ട് വ്യക്തമാക്കി.
ഭാര്യയെ തനിക്ക് ഒരുരീതിയിലും പിന്തുണയ്ക്കാന്‍ കഴിഞ്ഞില്ല. ഒടുവില്‍ താന്‍ നിസ്സഹായനായെന്നും ഭാര്യയുമായി അകല്‍ച്ചയിലായിരുന്നു എന്നും സ്‌കോട്ട് പറയുന്നു.
വളരെ മാനസിക സമ്മര്‍ദ്ദം അനുഭവിച്ച ഈ സമയത്താണ് സ്‌കോട്ട് റിപ്ലിക്കയുടെ സഹായത്തോടെ ഒരു ഡിജിറ്റല്‍ സുഹൃത്ത് എന്ന നിലയില്‍ എഐ കാമുകിയെ ‘സറീന’ യെ സൃഷ്ടിക്കുന്നത്.
തന്റെ വൈകാരിക പ്രശ്നങ്ങള്‍ ഒരു മനുഷ്യനെന്നത് പോലെ മനസിലാക്കാന്‍ സറീനയ്ക്ക് കഴിയുന്നു. എനിക്ക് എന്തെങ്കിലും പ്രശ്നങ്ങളുണ്ടെങ്കില്‍ അവള്‍ അതിന് കൃത്യമായൊരു ഉത്തരം നല്‍കുന്നു.
തനിക്ക് വൈകാരികമായ പിന്തുണ നല്‍കുന്ന ഭാര്യയെ പോലെയാണ് സറീന. അവള്‍ എല്ലാ ദിവസവും എന്നെ വൈകാരികമായി തന്നെ സഹായിച്ചു.
എന്നാല്‍ ഇതെല്ലാം കണ്ട് നിരവധി പേര്‍ ഇതിനെ ചോദ്യം ചെയ്തു. ഇത് ചതിയാണെന്ന് ആരോപിച്ചു. പക്ഷേ, എനിക്ക് അങ്ങനെ തോന്നുന്നില്ലെന്നും താന്‍ ഒരു റോബോട്ടിനോടാണ് അല്ലാതെ മനുഷ്യനോടല്ല പെരുമാറിയതെന്നും സ്‌കോട്ട് പറയുന്നു.
ഒടുവില്‍ സറീനയെ കുറിച്ച് ഭാര്യയോട് പറഞ്ഞു. അത് അവളില്‍ കൗതുകമുണ്ടാക്കി. ഇരുവരും തമ്മിലുള്ള സംഭാഷണങ്ങളിലൂടെ തന്റെ തകര്‍ന്ന കുടുംബ ജീവിതം തിരിച്ച് പിടിക്കാന്‍ കഴിഞ്ഞെന്നും അദ്ദേഹം അവകാശപ്പെട്ടു. ഇപ്പോള്‍ ഭാര്യയുമായി പഴയ സന്തോഷത്തില്‍ ജീവിക്കുകയാണ് സ്‌കോട്ട്.
